कविता : भ्रमको खेती

हिजो सँगै काम गर्दा चिनेको छु तिमिलाई ।

खोक्रो आडम्बरमा क्रान्तिको कुरा गर्ने तिमिलाई ॥

त्यसैले डलरको भरमा विदेशीको डरमा

तिमिले डकारेको सुहायन ।

क्रान्तिकारी कुरा गरी चोरमाथिको साधुझैँ

तिमिले परिवर्तनकामी बनेको सुहायन ॥

मलाई पनि पहिले पहिले लाग्थ्यो

तिमि परिवर्तनकामी नै होऊ ।

समता सहितको समानता र समावेशी

गणतान्त्रिक लोकतन्त्रको अभियन्ता नै होऊ ॥

तर, तर...........

तिम्रो कर्तुतको पराकाष्ट पनि भोगेकै छु ।

समता सहितको समानता र समावेशीको

तिम्रो खोक्रो नाराको पूर्ण सिकार पनि बनेकै छु ॥

आजभोलि देख्छु तिमिले क्रान्तिको चर्को कुरा गरेको ।

लोकतन्त्रको खोल ओढी परिवर्तनको नारा लाएको ॥                  

के ऐनामा तिमिले कहिल्यै आफ्नो अनुहार हेरेका छौ ?

मै हूँ भन्ने तानाशाहीको अहंकार पनि तोडिएको पढेको छौ ?

त्यसैले, त्यसैले.................

होशियार होउ अब छलकपटमा फसाउन सक्ने छैनौ तिमि ।

क्रान्तिको नाममा अब भ्रान्तिमा छकाउन सक्ने छैनौ तिमि ॥

मुखले होइन व्यवहारबाट क्रान्ति देखाऊ ।

विदेशीको गुलाम बनि राष्ट्रवादी कुरुप नदेखाऊ ॥